Editatu irudia
Cristóbal Balenciaga Fundazioak, Cristóbal Balenciagari eta haren lanari buruzko ikerketa sustatzeko, helburu nagusi duen aldetik, jostunari buruzko Nazioarteko Biltzarraren bigarren edizioa antolatu du 2025eko urriaren 2an eta 3an Getariako Cristóbal Balenciaga Museoan.
Nazioarteko proiekzioa duen kongresu akademiko honek ikerlan eta proposamen berritzaileak eta kalitatezkoak azaltzeko plataforma bat izan nahi du. Gaia modistaren figura eta legatua izango da, haren alderdi guztietan (pertsonala, enpresakoa, sortzailea, teknikoa, etab.). Orobat, tokia izango dute Balenciagaren testuinguru biografikoa, kulturala eta lanekoa aztertuko dituzten ikerketek ere.
Edizio berri honetan Cristóbal Balenciagari buruzko 24 azterlan berritzaile aurkeztuko dira, mundu osoko erakunde akademiko eta ikertzaileengandik jasotako 60 proposamen baino gehiagoren artean aukeratu ondoren.
Miren Arzalluz Historian lizentziatu zen Deustuko Unibertsitatean, Politika Konparatuaren masterra egin zuen London School of Economics unibertsitatean, bai eta Artearen Historiako masterra ere, Jantziaren Historian espezializatuta, Courtauld Institute of Art institutuan. 2021ean amaitu zuen doktoretza Deustuko Unibertsitatean. Bere ikerketan, euskal kostaldeko modaren sorrera aztertu zuen, eremu hori udako nazioarteko helmuga turistiko gisa garatzeko funtsezko faktore gisa, eta Gabrielle Chanel eta Cristóbal Balenciaga jostunek testuinguru horretan izan zuten funtsezko rola jorratu zuen.
Cristóbal Balenciaga Fundazioaren bildumen eta erakusketen arduraduna izan zen 2006 eta 2013 artean, eta Cristóbal Balenciaga. La forja del maestro (1895-1936) liburua argitaratu zuen garai berean. 2013 eta 2017 artean komisario eta ikertzaile independente gisa egin zuen lan, eta Parisko Palais Galliera eta Anberesko Mode Museum museoekin lankidetzan aritu zen, besteak beste.
2018ko urtarrilean, Parisko Palais Galliera modaren museoko zuzendari bihurtu zen, eta haren berrikuntza handia gidatu zuen. 2024an, Guggenheim Bilbao Museoaren patronatuak zuzendari izendatu zuen, Juan Ignacio Vidarte ordezkatzeko, hura 2025eko apirilean erretiratu ondoren.
Ana Balda irakasle titularra da (ANECA agentziak 2024an ofizialki egiaztatua). 2013tik, irakasle elkartua da Nafarroako Unibertsitateko Komunikazio Fakultatean, eta Modaren Historia eta Ilustrazioa eta Modako Argazkilaritza irakasgaiak ematen ditu han.
2013an amaitu zuen Balenciaga etxearen 1937-1968 aldiko komunikazioari buruzko doktoretza eta, ordutik, euskal diseinatzailearen bizitza, obra eta testuingurua ikertzen jarraitu du. Ikerketa-lan horren ondorioz, komisario izan da hainbat erakusketatan, eta zenbait artikulu argitaratu ditu aldizkari akademikoetan eta liburu espezializatuetan.
María Kublinekin batera, Kublin-Balenciaga. A Fashion Record (Thames & Hudson, 2024) liburua idatzi du.
Emily Brayshaw ezaguna da nazioartean modaren eta jantzi eszenikoen kultura bisualaren inguruan egin duen lanagatik. Ohorezko ikertzailea da University of Technology Sydney unibertsitatean.
Haren diziplinarteko ikerketak moda kritikoaren eta jantzi eszenikoen iragana, oraina eta etorkizuna aztertzen ditu, arreta berezia jarrita identitateetan, luxuan, jantzi materialetan, gorpuztasunean eta XIX. mendetik gaur arte erabili diren diseinu-metodologietan.
Aldi berean, Emily lankidetza aktiboan aritzen da arlo artistikoarekin Sydneyn; han, diseinatzaile lanetan aritzen da antzerki-ekoizpen oso ospetsuetan.
Sophie Kurkdjian irakasleak jantzien eta modaren historia kultural eta sozialari buruzko eskolak ematen ditu American University of Paris unibertsitatean, 2020ko irailetik. Ikertzaile elkartua da Institut d’histoire du temps présent (CNRS) erakundean 2012tik; han, modaren historia kulturalari buruzko ikerketako mintegi bat antolatzen du.
2018an, Culture(s) de Mode ikerketa-sarea sortu zuen, Frantziako Kultura Ministerioarekin lankidetzan. Komisario gisa, 2017an Mode & Femmes, 14-18 erakusketa antolatu zuen Parisko Forney liburutegian.
Historia kulturalari buruzko ikasketak amaitu ondoren, doktoretza lortu zuen 2013an, XX. mendearen hasierako modako egunkarien eta argitaletxeen inguruko tesi batekin. Parisek 1858 eta 1947 artean “modaren hiriburu” gisa izan zuen estatusaren eraikuntza historikoari buruzko ikerketa-proiektu bat egin ondoren, gaur egun 1880 eta 1940 bitarteko jantzien eta modaren industriako lanaren eta emakume langileen historia ari da jorratzen.
Lesley E. Miller Jantzien eta Ehunen Historiako irakaslea da Glasgowko Unibertsitatean, 2013tik. 2005 eta 2021 artean, Ehunen eta Jantzien kontserbatzaile nagusia izan zen Londresko Victoria & Albert Museum museoko Altzari, Ehun eta Moda Sailean.
Balenciagari buruz idatzi zuen lehen liburua 1993an argitaratu zen, eta bigarren edizioa goitik behera orraztu zuten Balenciaga: Shaping Fashion (V&A, 2016-2017) erakusketarekin batera argitaratzeko, komisario aholkulari gisa aritu baitzen horretan.
Gaur egun, Frantziako eta Espainiako XVIII. mendeko zeten diseinuari eta salmentari buruzko ikerketa bat ari da egiten, hura baita bere hurrengo monografiaren gai nagusia.
Carlos Naya Nafarroako Unibertsitateko Arkitektura Eskolako dekanoa da 2021etik. Doktoretzako Sari Berezia eman zioten XX. mendeko arte-abangoardien idazki eta adierazpen nagusiei buruz egin zuen ikerketa teorikoagatik.
Ikertzaile bisitaria izan zen Columbia Unibertsitateko GSAPP eskolan (New York, 2007-2008), zeinetan lankidetzan aritu baitzen arkitekturako zenbait teorialari ospetsurekin, esaterako, Kenneth Framptonekin, Mark Wigleyrekin eta Joan Ockmanekin. Eskolak eman ditu ISEM Fashion Business School erakundean (Nafarroako Unibertsitatea, Madril), baita Europako eta Amerikako zenbait arkitektura eskolatan ere, besteak beste, Londresko Architectural Association School of Architecture delakoan.
Gaur egun, lankidetzan aritzen da London College of Fashion erakundearekin (UAL, Londres), nazioarteko master bat antolatzen.
Alexandra Palmer Royal Ontario Museumeko (ROM) Nora E. Vaughan kontserbatzaile nagusia da, eta Europatik eta Ipar Amerikatik ekarritako mendebaldeko modako 44.000 ehun-piezako bilduma batez arduratzen da.
Torontoko Unibertsitateko Artearen Historia Saileko irakasle bazkidea da; hain zuzen, ehunek eta modak klima-aldaketan duten inpaktuari buruzko eskolak ematen ditu han.
Guztira 20 erakusketa baino gehiagotan izan da komisario ROM museoan, parte hartu du nazioarteko zenbait museoren katalogoetan eta hainbat liburu eta aldizkari akademikotan, eta saritutako hiru argitalpenen egilea da. 2023an Chevalier dans l’Ordre des Palmes académiques izendatu zuten, Frantziako kulturari egindako ekarpenagatik.
Elisa Palominok 25 urteko esperientzia du John Galliano, Christian Dior, Moschino, Roberto Cavalli eta luxuzko beste hainbat markarentzat diseinatzen, eta zubiak eraikitzen ditu modaren, hezkuntzaren eta antropologiaren artean.
Antropologian eta Moda Jasangarrian doktoretza egin zuen London College of Fashion eskolan, hitzaldiak ematen ditu nazioartean eta hamarkada batez Fashion Print arloko zuzendaria izan zen Central Saint Martins unibertsitatean.
Arrakastaz gidatu ditu Europar Batasunak finantzatutako zenbait proiektu, esaterako, Horizon 2020 programako FishSkin delakoa, eta ospe handiko zenbait beka jaso ditu, besteak beste, Fulbright, Kluge Fellowship Kongresuko Liburutegian, Zientziaren Historiako Max Planck Institutuarena, Fondazione Cini fundazioarena, Florentziako Kunsthistorisches Institut delakoarena, Max-Planck Institute elkartearena eta ANAMED erakundearena.
Gaur egun ikertzaile elkartua da Smithsonian Arctic Studies Center erakundean, zeinetan Artikoko moda indigenan espezializatzen ari baita. Gainera, Cristóbal Balenciaga Fundazioaren hezkuntza-arloko aholkularia da, bai eta Cristóbal Balenciaga Museum Transmissions hezkuntza-programaren sortzaileetako bat ere.
Karena De Perthuis irakasle titularra da Western Sydney University unibertsitateko School of Humanities and Communication Arts eskolan, eta International Journal of Fashion Studies aldizkariko editore burua.
Haren ikerketak modaren, hedabideen eta gorputzaren arteko elkargunea aztertzen du. Haren azken argitalpenen artean askotariko lanak aurki daitezke: modako argazkigintza, modaren performatibitatea, modaren utopiak, Instagrameko eragin-sortzaileak eta Tilda Swintonen bizitza jorratzen dituztenak, besteak beste.
Gaur egun, The Fashionable Ideal: Undoing Bodies and Images in Fashion izeneko monografia batean ari da lanean, eta 2024an argitaratuko du Bloomsbury argitaletxeak.
Véronique Pouillard doktorea katedratikoa da Osloko Unibertsitateko Arkeologia, Kontserbazio eta Historia Sailean. Bere ikerketa-lanean, enpresen eta ekonomiaren historia jorratzen du, arreta berezia jarrita hedabideetan, luxuan, manufaktura-industrian eta jabetza intelektualeko eskubideen historian. Hain zuzen, gai horiei buruzko zenbait liburu eta artikulu argitaratu ditu.
Paris to New York: The Transatlantic Fashion Industry in the Twentieth Century (Harvard University Press, 2021) liburuaren egilea eta The Oxford Handbook of Luxury Business (Oxford University Press, 2021) eskuliburuaren argitaratzaileetako bat da.
Ikertzaile nagusia izan da Zientziaren aldeko Europako Fundazioak finantzatutako HERA II The Enterprise of Culture proiektuan, bai eta diziplinaz gaindiko UiO:Norden (2017-2019) ekimenak sustatutako Nordic Branding proiektuaren lau koordinatzaileetako bat ere.
Gaur egun, ERC Consolidator (Grant 818523) programak finantzatutako CREATIVE IPR – The History of Intellectual Property Rights in the Creative Industries (2019-2025) proiektua zuzentzen du. Liburu berri bat idazten ari da nazioartekotzearen historiari eta jabetza intelektualaren kolonizazioari buruz.
Giorgio Riello Aro Modernoaren Mundu Historiako irakaslea da Fiesoleko (Italia) European University Institute erakundean. Halaber, Historia eta Munduko Kultura irakasten du Warwickeko Unibertsitatean, Erresuma Batuan (gaur egun eszedentzian dago).
Liburu hauek idatzi ditu: A Foot in the Past (2006), Cotton: The Fabric that Made the Modern World (2013), Luxury: A Rich History (2016, P. McNeilekin batera idatzia), Back in Fashion: Western Fashion from the Middle Ages to the Present (2020) eta Tutte le perle del mondo (2023, M.G. Muzzarellirekin eta L. Molarekin batera idatzia).
Era berean, beste hauen argitaratzaileetako bat izan da: The Right to Dress: Sumptuary in a Global Perspective (2019), Dressing Global Bodies (2020) eta The Cambridge Global History of Fashion (2 liburuki, 2023).
Simona Segre-Reinach moda ikasketetako irakasle titularra da Boloniako Unibertsitatean. Asko idatzi du modari buruz, mundu-mailako ikuspegi batetik.
Hona hemen bere azken argitalpenetako batzuk: Fashion in Multiple Chinas. Chinese Styles in the Transglobal Landscape (2019), Biki. French Visions for Italian Fashion (2019) eta Per un vestire gentile. Moda e liberación animale (2022).
Fashion Theory eta Critical Studies in Fashion and Beauty aldizkarietako argitaratze-batzordeko kideetako bat da.
Valerie Steele zuzendaria eta kontserbatzaile burua da Fashion Institute of Technology (FIT) museoan, zeinetan 25 erakusketa baino gehiago antolatu baititu 1997tik.
Guzira 30 liburu baino gehiago idatzi eta argitaratu ditu, eta txinerara, frantsesera, alemanera, italierara, portugesera, errusierara eta espainierara itzuli dira. Gainera, Fashion Theoryren: The Journal of Dress, Body & Culture modako ikasketei buruzko lehen aldizkari akademikoaren sortzailea eta editore burua da.
2014tik gaur arte The Business of Fashion 500 zerrendan dago, modaren mundu-mailako industria moldatzen ari diren pertsonetako bat den aldetik.
Igor Uria Arte Ederretan lizentziatu zen Euskal Herriko Unibertsitatean, eta Kontserbazioan eta Zaharberritzean espezializatu zen. Espezializatzeko ikasketak egin ditu Deustuko eta Alcalá de Henaresko unibertsitateetan, zenbait ikastaro Lyongo CIETA zentroan, eta Curating Fashion and Dress ikastaroa Londresko V&A International Training Course delakoan.
2004tik Cristóbal Balenciaga Fundazioko Kontserbazio eta Erregistro Saileko arduraduna izan zen. Gaur egun, Cristóbal Balenciaga Museoko Bildumen zuzendaria da 2014tik, eta erakundean aurkeztutako erakusketa gehienen komisarioa izan da.
Aldamar Parkea, 6
20808 Getaria, Gipuzkoa
E-posta: info@cristobalbalenciagamuseoa.com
Telefonoa: + 34 943 00 88 40
